Club de lectura de familias, recomendación lectora: "Asasinato no muiño do cura" de Arantza Portabales.

Na tarde de onte, algúns membros do noso club asistimos á presentación no novo auditorio de Marín, da última novela de Arantza Portabales. O evento organizado polo Servizo de Igualdade da Deputación de Pontevedra ( Lucía e Marta, e coordinado por Susana Pedreira) no marco do programa "Mulleres de Palabra -s" podemos dicir que resultou unha marabillosa aposta pola "palabra" en clave feminina, pola escrita e pola lectura de muller, pola localización e reivindicación do espazo literario (Loira e Marín), pola memoria en clave persoal (a da escritora), polo mundo social e xeográfico do rural galego (Loaira), o das relacións persoais e interxeracionais da muller e do rural (a veciñanza); moi interesantes por certo as relacións da adolescencia na aldea... o protagonismo social e cultural das mulleres e as interactuaccións entre elas.

Unha conversa, a de Susana Pedreira e Arantza Portabales  que nos abriu portas á reflexión sobre o noso pasado máis inmediato, a visibilización da vida e peso das mulleres ( non hai moito tempo),  sobre a nosa Galiza (e a súa sociedade) nas pequenas vilas, as xentes, os comentarios, as visións e os perfís, os xuízos morais, en palabras de autora sobre "escribir a vida", nun marco de novela negra que nos intriga, que nos sorprende e fai que a lectura sexa fluída para chegar a resolución do crime. 

Sorpréndenos e conquístanos como o contido da historia nos leva a temas profundos, como nos conduce a reflexionar sobre a nosa identidade e o que nos identifica coma mulleres (protagonistas) de Loira e de Marín.

En conclusión, a novela de Arantza Portabales, non se trata simplesmente dunha novela negra de asasinatos, aporta valores e reflexións moito máis alá, valores femininos e mesmo do empoderamento das mulleres do rural galego da etapa da transición nas aldeas galegas.

"Compracer nunca, con pracer sempre" encontro lector coa poeta Carme Quinteiro.

No día de onte recibimos con ledicia, no club de lectura de familias, á poeta Carme Quinteiro para compartir poemas e falar do seu poemario "Compracer nunca, con pracer sempre". Iniciamos o encontro falando do título da súa obra e de como foron nacendo pouco a pouco os poemas que a conforman, de como foi nacendo o diálogo entre a voz poética coa muller e coa propia poeta. 

Realmente a conversa foi do máis pracenteira pola amabilidade con que a autora nos compraceu: Cada lectora do club compartiu con ela o poema que máis lle chegou ou gustou para comentar e partillar co grupo as súas sensacións e mesmo os sentimentos que os versos lle provocaron; Carmen falounos da construción dos poemas, das dificultades de entrar e saír do mesmo, das persoas a quen llelos escribiu, de como naceron e como foron conformando este fermoso e sensible poemario.

Unha sesión na que se falou moito de ler poesía, dos gustos lectores e que culminou cando a autora nos agasallou co seu último poemario que, como non, será a nosa próxima lectura. 

Agradecidísimas quedamos todas a Carmen Quinteiro por contaxiarnos o seu amor polos versos e a poesía. 

Eli Ríos comenta DX co alumnado de 2º

O club de lectura conformado por alumnado de 2º da ESO afonda esta avaliación na lectura guiada de DX, da autora Eli Ríos (aposta arriscada onde as haxa, mais ben interesante). Así pois, aproveitando que a escritora estivo presente a pasada semana no IES Sánchez Cantón nunha xornada case maratoniana con diversos grupos lectores, tivo lugar un encontro sobre esta obra ambientada na Coruña.

Na cita, o alumnado conversou sobre temas variados. Xa que logo, nun primeiro momento, o diálogo xirou arredor do xénero dos personaxes das novelas, pois na obra non aparece marcado o xénero dos protagonistas. Neste sentido, Eli Ríos apuntou a necesidade de deixarmos a un lado os estereotipos que se asocian tradicionalmente aos homes ou ás mulleres e de centrármonos máis na construción dos personaxes.

Máis adiante, a autora foi interrogada polas súas orixes londinienses por un dos alumnos participantes, polo que explicou brevemente a súa traxectoria vital en relación coa emigración de seus pais e a súa volta cun ano de idade a terras galegas.

Xa para finalizar, a análise do libro xirou arredor das grandes empresas e da cidade en que se ambienta o libro. Desta maneira, como era a primeira xuntanza sobre esta obra, o alumnado quedou con ganas de máis.

Por último, unha das alumnas presentes quixo compartir unha das citas máis interesantes que lera na obra e que deixou bo pouso en todos os participantes:

"Se algo aprendín de todo isto é que calquera día de calquera semana de calquera ano saes tan tranquilamente como todas as mañás para levar as crianzas á escola e un autobús perde os freos e fai contigo, e coas nenas, un acordeón contra o camión de diante. Si, Morgan, si, é importante a última frase que podes escoitar na túa vida. E se agora a Mário lle dese unha síncope e o derradeiro que alguén lle dixese fose unha estupidez sobre unhas pulgas imaxinarias? A vida é como un poema constante no que cada verso ten vida por si mesmo e que se xuntan para crear realidades novas. Desde o accidente propóñome que cada frase que diga teña o valor que lle quero dar, e se pode ser algo positivo pois mellor que mellor. Nunca sabes cal vai ser a derradeira frase da túa vida."

"Remexido de patacas". Recibimos a Eli Ríos.

 

Seguindo coa celebración das Letras galegas 26, o mércores recibimos na nosa biblioteca á escritora e crítica literaria de A Sega, Eli Ríos autora da nosa lectura "Remexido de patacas".

A xuntanta arredor da novela, das súas claves interpretativas (patacas, gato, luvas, flores, coitelo...) e dos temas transversais que esta toca como feminismo, violencia doméstica, patriarcado, saúde mental, amor... centraron a conversa coa autora ao longo de hora e media na que a rapazada puido facerlle preguntas e aclarar dúbidas (fundamentalmente sobre o final aberto da obra, sobre a sombra do gato...) da súa lectura.

Frases contundentes coma: 

" O feminismo nunca matou mulleres"

"Eu non quería dicirche que a miña voz é máis importante cá túa, se quero cambiar as cousas teño que ofrecerche as mesmas posibilidades que eu teño"

"Os corpos son diverso e as habilidades son diversas"

"Escribo para construír un mundo máis igualitario"

"O machismo que se exerce e prepetúa como dominio e explotación da muller"

"A lingua é unha maneira de ver o mundo"

"As patacas non asasinan, son moi galegas, son nosas; a pataca é un elemento cultural para nós"

"Como imos cambiar o mundo se vós non contades a vosa historia"

déronnos que pensar, que debater, proporcionáronnos unha ollada máis completa sobre a lectura da novela. Grazas mil Eli Ríos por acompañarnos e facernos saír do noso espazo de confort, por facernos ler e pensar.

Letras galegas 26: Beatriz Caamaño, Club de lectura "O sofá violeta" e Club de lectura de 1º bacharelato "Nube de palabras"

 

O pasado martes tivemos o pracer de recibir na nosa biblioteca a Beatriz Caamaño (irmá de Begoña Caamaño a quen se lle adica o Día das Letras Galegas deste ano), a Montse Fajardo, coordinadora do club feminista do Concello de Pontevedra "O sofá violeta" e ás súas compoñentes para desenvolver unha xuntanza lectora común coas nosas rapazas do club de lectura de 1º bacharelato B arredor da personaxe da escritora e en concreto da lectura realizada Morgana en Esmelle.

Realmente foi un encontro lector enriquecedor, tenro e moi emotivo, cada grupo aportou puntos de vista desde posturas diferentes grazas ás miradas interxeneracionais polo que foi un encontro lector no que confluíron ideas, lecturas, opinións, desfrutes lectores variados e diversos conformando un tecido colorido marabilloso arredor da nosa lectura.

A sesión comezou cun percorrido polo espazo vital de Begoña Caamaño no que a súa irmá tivo a amabilidade de compartir connosco vivenzas que nola fixeron sentir moi perto, incidimos no seu activismo e logo xa nos centramos nas claves interpretativas da novela ( mitos, personaxes, trama, valores...), Realmente a posta en común foi moi fluída e houbo un espazo no que todas participaron e aportaron, as máis mozas opinando e dirixindo os enfoques lectores e as máis adultas comentando e compartindo.

Non só a literatura, o activismo feminista e o mundo da radio tiveron un espazo importante non só na decoración da mesa arredor da cal convivimos senón tamén nas nosas conversas e olladas. Moi emotivo resultou cando Beatriz Caamaño se dirixiu ás mási novas dicindo que se Begoña estivera presente no encontro se sentiría moi orgullosa de conversar con eles. 

Unha gorentosa merenda puxo fin a esta sesión tan, tan especial; parabéns a todas e en especial a elas, as máis novas, depositarias do legado literario e ideolóxico de Begoña Caamaño.

De certo que foi un pracer compartir lectura do club coordinado por Montse Fajardo e non descartamos, logo de falar coas participantes de ambos clubs de poñer en marcha novas colaboracións lectoras.

Grazas a todas por participar.

"Escribo porque me gusta moitísimo imaxinar" Encontro lector con Rosa Aneiros.

     No día de hoxe, os clubs de lectura de 1º de bacharelato, tivemos o pracer de desfrutar dun encontro lector coa escritora Rosa Aneiros ao redor da lectura da novela gañadora do premio Raíña Lupa, Unha historia de amor coma outra calquera.

    O faladoiro coa escritora foi moi completo xa que se centrou na obra lida polos clubs ( temas, escrita, contexto, documentación e ambientación da novela, as e os  perfís dos e das personaxes, música, argumento, obxectivos de transmisión, bases científicas... ) e tamén noutros coma as lecturas da rapazada, a escrita ( relacionando coa anterior actividade na radio), as competencias da escritora para "intentar meterse na cabeza do outro", a súa inquedanza para "preocuparse polo mundo que lles estamos deixando a nivel humano", ou a "necesidade de fomentar  a curiosidade e a imaxinación", etc.

    Rosa Aneiros defende que "lemos o que queremos ler", "somos todos diferentes" mais na adolescencia prima o que nos une , falamos do que nos une, do que nos fai ser iguais e a ela gústalle "xogar coas palabras", "intentar meterse na cabeza do outro" e iso é o que lle permite a literatura.

A respecto da súa traxectoria literaria di que "procura romper moito entre obra e obra, cambiar de rexistro ao escribir"; un encontro moi enriquecedor para a anosa rapazada lectora no que a escritora amablemente déunolo todo, mil grazas Rosa Aneiros.

Os clubs de lectura de 1º de bacharelato B e C visitan PontevedraViva Radio.

 

No día de onte, os clubs de lectura de 1º de bacharelato B e C, visitamos PontevedraViva Radio coa intención de participar no programa de fomento de lectura que a cadea desenvolve co gallo da celebración das Letras Galegas.

A conversa coa xornalista Marisa Ciordia estivo composta de varios bloques: Información e medios de comunicación entre a rapazada do club, achegamento ao club de lectura, hábitos e preferencias lectoras entre eles e elas (xéneros, temáticas...) e finalmente centrámonos na figura da escritora e comunicadora Begoña Caamaño para rematar cunha análise da lectura que o noso alumnado realizou da súa obra Morgana en Esmelle ( temáticas, personaxes, feminismo, accións e valoración da novela).

Rematou a conversa con tres dos nosos alumnos (Nico, Mariola e Sofía) centrada nas súas prácticas escritas. Con todo o material que se gravado neste encontro, a cadea radiofónica elaborará un podcast que poderemos escoitar na súa páxina nun futuro e do cal nos enviarán un enlace.

Construtiva visita, moi educadora e tamén moi reflexiva arrador dos temas sobre os que dialogaron; a rapazada saiu moi animada desta experiencia formadora.

Viaxamos á Antartida co biólogo Luís Sampedro e con "Unha historia de amor como outro calquera" de Rosa Aneiros.

 Tras a lectura da novela de Rosa Aneiros Un amor como outro calquera" nos clubs de lectura de 1º de bacharelato B e o club de C quedamos con ganas de ampliar os nosos coñecementos sobre a Antártida e as investigacións científicas que alí se realizan e nada mellor que un encontro co biólogo mariño Luís Sampedro, investigador do CSIC na Misión Biolóxica de Salcedo (Pontevedra) que participou dun proxecto de investigación no continente branco e que ben podería ser o alter ego da Olalla Caínzos da nosa lectura.

Comezamos a sesión coa lectura dun fragmento escollido da nosa novela por Laura e a seguir Cecilia fíxolle un resumo da obra ao investigador para xa logo cederlle a palabra. Ao londo dunha hora a súa exposición divulgativa engaiolonos, falounos do proxecto que alí desenvolveu, de como o presentou, da viaxe ata a Antártida, da súa xeografía, temperatura, condicións de vida, do efecto espello, da organización do xeo e a súa expansión... foi superinteresante ver as imaxes que nos amosou, ver un albatros coma o albatros ferido que viu Olalla Caínzos e poder realizar preguntas que Luís Sampedro contestou con rigor e amabilidade.

E como queremos máis, o noso biólogo, que por certo levou a novela de Rosa Aneiros para ler, prometeunos volver despois das vacacións para falarnos da descomposición das algas e os seus efectos que alí estudou e do seu proxecto actual.

Sentímonos moi agradecidos e agradecidas a Luís pola súa amabilidade que nos conquistou e xa preparamos o próximo encontro ( a ver que impresións nos transmite da lectura da novela).

Participamos na Festa dos clubs de lectura do Salón do Libro.

 

Como xa vén sendo habitual participamos na Festa dos Clubs de Lectura do Salón do Libro de Pontevedra e este curso tocoulle asistir ao alumnado dos clubs de lectura de 1º de bacharelato xa que o artista invitado era MONDRA e tanto a súa profe coma eles e elas estaban desexando escoitalo e coñecelo.

Na festa participaron os clubs dos centros de ensino de Pontevedra e arredores que puideron facerlle unha chea de preguntas a Mondra e celebrar a lectura coa súa música. Logo do encontro puideron realizar unha visita ao Salón coam sempre moi fermosa e interesante. 

Ademais tiveron outro anfitrión moi, moi especial: ORBIL.

Presentando os clubs de lectura do Sánchez Cantón na Xornada de Mediación Lectora do Salón do Libro.

  Salón do Libro convidounos a presentar o noso proxecto de Clubs de Lectura na Xornada de Mediación Lectora onde compartimos mesa con outros ineresantes proxectos lectores coma Espazo Lectura, A Sega de crítica literaria e a Libraría Seijas: 

E esta foi a nosa presentación:

"Unha historia de amor como outro calquera" de Rosa Aneiros nos clubs de lectura de 1º Bach. B e 1º de Bach. C

 Pois xa estamos repartindo os exemplares de lectura da novela xuvenil da nosa querida Rosa Aneiros nos clubs de lectura de 1º de bacharelato, B e C Un amor coma outro calquera, ganñadora do Premio Raíña Lupa 2024. Para ir abrindo boca xa lles deixamos un pequeno adianto sobre elementos narrativos da obra: 

E na nosa reunión de hoxe xa fixemos as primeiras imaxes: