Club de lectura de familias

 

Encontro literario coa autora Eva Mejuto do club de familias arredor de 22 segundos.

 Nesta ocasión a lectura reuniu ás mamás e aos fillos ( club de 2º de ESO)  nun encontro lector coa escritora Eva Mejuto e que serviu de colofón a este curso lector 23/24.

22 segundos foi a novela que favoreceu este punto de encontro familiar, o tema do tratamento da diversidade de xénero, da transexualidade  e o seu tratamento entre os adolescentes nos centros de ensino foi a porta que nos abriu a autora para debullar nos capítulos da súa novela. A partir da obra tamén as mamás aportaron o seu gran de area falándonos da súa experiencia profesional a respecto do tema, en concreto na sanidade e nos xulgados de menores. 

Agradecemos a Eva Mejuto que nos fixera un oco na súa apertada axenda e fora tan receptiva coas nosas preguntas e comentarios.  E ata aquí esta experiencia de lectura adultos/adolescentes que pon fin ao noso curso lector.

"A ladroa da biblioteca de Meirás"

 Sempre fieis ás novidades narrativas de Eva Mejuto, tivemos hoxe a primeira sesión arredor da lectura de A ladroa da biblioteca de Meirás. Acompañamos os nosos comentarios sobre a obra coa lectura de fragmentos dunha obra das que facían ler ás mozas da posguerra coa fin de modelalas ao xeiro relixioso de conduta na ditadura franquista " La joven creyente". 

A novela está a darnos moito xogo para falar de represión, de inxustizas, diversidade e de igualdade ao tempo que coñecemos un episodio fundamental da nosa historia.

O contexto histórico de A LAVANDEIRA DE SAN SIMÓN.

 

O contexto de "A lavandeira de San Simón"

O noso profesor e colaborador do club de lectura, Humberto Martínez Gargamala, agasallounos con este genially arredor do contexto do álbum ilustrado para completar e ilustrar a nosa lectura en clubs do álbum ilustrado de Eva Mejuto e Bea Gregores.

Grazas mil.

 

Encontro literario coa escritora EVA MEJUTO ( Programa Actividades literarias en Institutos de Educación Secundaria. Ministerio de Cultura).

 

 

Innauguramos este estraño curso lector cunha visita de alto nivel, a da escritora Eva Mejuto, actividade encadrada dentro do programa do Ministerio de Cultura "Actividades literarias en Institutos de Educación Secundaria".

 

 

 

 

Coma a nosa biblioteca funciona coma aula e coma hai que respectar o tempo de duración das actividades e o número de participantes polas normas COVID, o encontro lector realizouse en dúas quendas e dous espazos ( a primeira na aula de 1º de ESO C e a segunda no paraninfo con 1º de ESO B e 1º de ESO F).

 

Aproveitamos esta visita para comezar as actividades de fomento da lectura que organizamos desde o club de lectura e celebrar ao tempo o Día das Bibliotecas ( aínda que fóra da biblioteca xa que esta foi reconvertida en aula).

 

 A escritora Eva Mejuto centrou o seu faladoiro coa rapazada no tema do oficio de escritora, no relato da súa traxectoria no mundo da escrita e na súas obras literarias publicadas para os e as, lectores xuvenís. Contoulle ao seu auditorio como era afeccionada á lectura e á escrita desde nena e como procurou unha profesión relacionada con estas, xornalismo; ben cedo descubriu que esta non lle gustaba e cando lle ofreceron traballar na editorial Kalandraka non dubidou en abandonalo e adicarse a "vivir do conto". Desde entón vive de facer libros e de escribir libros.

 

  Comezou a escribir adaptando historias ( a partir de contos tradicionais naceron os álbumes ilustrados Maruxa, A Mosca chosca ou Corre,corre cabaciña, traducidos a máis de dez idiomas). Vendo un documental que falaba sobre nenos trans naceu a idea de "22 segundos", xa que pensou que de escribilo podería servir para amosar distintas realidades do mundo trans. O libro fluiu grazas á documentación sobre o tema, traballo previo á escrita. Logo de escribir o libro hai que correxir e darlle moitas voltas ao texto relatoulle ao alumnado. O libro chegou, conta Eva Mejuto, cando se falaba do tema trans e xa vai pola sétima edición, tivo un longo percorrido e foi logo traducido ao español.  

 

 Para rematar o encontro, a nosa rapazada puido facer preguntas á autora e case non chegamos a tempo á seguinte sesión pois non deixaban de preguntar, o que amosa a boa conexión que se estableceu entre a escritora e o seu auditorio. Agradecementos, un caloroso aplauso e a invitación a futuros encontros e lecturas puxo final a esta reunión tan enriquecedora.

 

 

Grazas á autora Eva Mejuto e ao Ministerio de Cultura por facilitarnos esta actividade. 

Ímonos de roteiro literario con Eva Mejuto: " Memoria do silencio"

Pois por fin chegou o día:  mañá os clubs de lectura de 4º e 3º de ESO ímonos de roteiro literario a Ribadavia con Eva Mejuto, arredor da  súa novela Memoria do silencio.

Achegarémonos á historia das irmás Touza, coñeceremos datos sobre á súa participación na cadea para salvar aos xudeus da persecución nazi, mais tamén nos achegaremos á historia, arte e cultura da vila do Ribeiro... e á súa gastronomía xudía (sorpresa, sorpresa...)

Todo un pracer vai ser percorrer Ribadavia con Eva Mejuto, compartir as súas pesquisas, nas que se baseou para escribir a novela, falar dos personaxes e dalgún xeito render xuntos e xuntas unha sentida homenaxe ás protagonistas da historia. Lola, Günter e Frida de seguro acompañarán os nosos pasos no roteiro.

Os versos de Celso Emilio, de Rosalía e cantares populares servirán para introducirnos na apaixonante cultura literaria de O Ribeiro. 

Haberá tempo para lecer, para mercar melindres e descansar da calor cun xantar "picnic" na área de A Veronza.

Un fermoso broche de ouro para as nosas lecturas deste curso 18/19. Desfrutade da visita.

Eva Mejuto e o seu "Memoria do silencio" na TVG

No club de lectura de 4º de ESO B estamos lendo "Memoria do silencio" a última novela de Eva Mejuto e aquí tedes o enlace á entrevista que lle fixeron no zig zag onde se falan dalgunhas das claves interpretativas da novela:

http://www.crtvg.es/tvg/a-carta/zigzag-4064225?t=277?t=278

Asistimos á presentación de MEMORIA DO SILENCIO de EVA MEJUTO.

A escritora Eva Meuto presentou a súa nova novela MEMORIA DO SILENCIO o pasado martes na Casa da Luz e o noso club de lectura de 4º de ESO asistiu ao acto.

Un acto moi especial no que ademais da conversa entre a autora e Mª Xesús Escudeiro sobre a obra, puidemos escoitar a Fran Alonso e as dúas contertulias ler un fragmento da novela; a música de Su Garrido Pombo ilustrou a presentación, á que asistiu unha chea de xente e os melindres típicos de Ribadavia (onde se localiza a acción) puxeron remate a un acto xa de por si moi doce e emotivo do cal desfrutamos moitísimo.

 (fotografía de Anxo Ganzález Guerra)

MEMORIA DO SILENCIO é unha historia a tres voces ( a de Gunter, a de Frida e a de Lola) que nos relatan a historia das irmás Touza, tres mulleres ribadenses que formaron parte da cadea humanitaria que axudou, durante a Segunda Grande Guerra, a fuxir aos xudeus da  persecución nazi, a través de Galicia e Portugal. Memoria do silencio xa que a historia destas heroínas foi descoñecida no seu pobo e na súa propia familia (o anonimato dos heroes na historia) e é Eva Mejuto quen nola narra agora para visibilizar o papel das mulleres que foron silenciadas no tempo e recuperalas para a Memoria Histórica, para transmitir o seu legado ás novas xeracións de lectores, de feito a novela preséntase nestas datas para entroncar coa data de homenaxe ás vítimas do Holocausto (27 de xaneiro).

O compromiso da autora coa historia e coa literatura paira ao longo de toda a novela no tratamento dos personaxes femininos (Frida e Lola fundamentalmente) e na descuberta dunha narración que navega entre o que é ficcional e o que forma parte da nosa realidade pasada, da herdanza que nos deixan Lola e as súas irmás, do seu comportamento exemplarizante e desinteresado nunha época convulsa na que o medo se respira ao longo da narración.

 Unha linguaxe sinxela e nada requintada, á que xa nos ten afeitos a autora, os diálogos fluídos e a acción dinámica farán que xoves e adultos se asomen a esta fermosa historia que transmite feitos e valores, que emociona e intriga, que namora e conquista desde a primeira escea cando coñecemos a Gunter e o seu peculiar e distintivo nariz que ten a capacidade de cheirar o medo.

Empatizamos con estas mulleres rurais, vendedoras de melindres e licor café na estación de Ribadavia, que souberon estar a altura do momento histórico que lles tocou vivir, que souberon coser cos fíos da liberdade, a liberdade propia e a de todos e todas aos que salvaron.

De seguro que no noso club desfrutaremos moi, moito con esta nova novela de Eva Meuto. Parabéns para ela.

22 segundos para TRANSformar o mundo nos clubs de lectura de 1ºbacharelato.

E intentamos TRANSformar o noso pequeno recuncho do mundo en 22 segundos coa calor e o agarimo de Eva Mejuto e as voces e a música de Canela Cafuné; e foi en 1º persoa pois en primeira persoa está escrita a novela da escritora.

Esperabamos con ilusión esta visita tras a lectura da obra primeira de Eva e non nos decepcionou,  coa lectura de fragmentos do libro, as cancións de Marta e Eric, as reflexións, as miradas adolescentes (inquisitivas e concentradas), o encontro desta mañá na biblioteca  foi unha gozada, unha apertura á diversidade e ao respecto mentras que coas cancións e as palabras alonxabamos de nós os prexuízos.

E berramos con Eric que queremos ser nós mesmos en liberdade.