xoves, 10 de decembro de 2020

O CARRIÑO LECTOR DO SÁNCHEZ. NADAL 2020.

 Xa vai chegando o Nadal e para que non nos pille sen lecturas desde o club de lectura e a biblioteca deseñamos este carriño lector cargado de regalos-libro.

Clica nos regalos-libro e terás información sobre os títulos, vídeos, enlaces, imaxes... que vos axudarán a escoller as vosas lecturas de Nadal. 

En Genially: Carriño lector.


luns, 23 de novembro de 2020

Novas prácticas para apoiar as nosas lecturas

 Os tempos COVID obrígannos a reinventarnos e coma apoio aos encontros persoais temos os nosos cursos da AV e EDIXGAL; o positivo que nos ofrecen estes cursos é:

  • Que nos permiten a privacidade de comentarios e publicacións para o grupo lector.
  • A comunicación a través de mensaxería é inmediata coas e cos membros do grupo lector.
  • A visibilidade de mensaxes e comentarios no foro para todos e todas.
  • Os vídeos non precisan subirse previamente a youtube, non precisamos dun aloxador xa que os subimos directamente á AV. favorece pois de novo a privacidade.
  • Incorporamos enlaces a arquivos, direccións web (URL) directamente nos textos. 
  • Podemos incluír un foro de debate diferente para cada lectura.

Un modelo do club de 4º ESO: 


 Outro do club de inglés: 












Evidentemente non hai nada que substitúa aos encontros presenciais, ao debate en directo, á calor humana, mais decididamente non imos renunciar a falar de libros, a reconstruír e compartir ideas, impresións e sensacións das nosas prácticas lectoras aínda que sexa virtualmente.

sábado, 31 de outubro de 2020

Proxecto do Club de Lectura do IES Sánchez Cantón en tempos COVID.


Sen perder a nosa continuidade "Nube de Palabras. Clubs de lectura do IES Sánchez Cantón" reconfigurámonos para adaptarnos aos tempos COVID e ás novas medidas de seguridade:

  • A finalidade: Ao desenvolvemento de prácticas lectoras entre o noso alumnado (Lecturas Compartidas), ao fomento da lectura, á formación de lectores críticos engadimos agora o apoio inclusivo (NEE) ao alumnado, proporcionándolle un espazo de socialización (presencial ou virtual) e de acompañamento emocional en tempos incertos.
  • A seguridade: Os grupos lectores redúcen o número dos seus participantes -pero non o de grupos- de 12/15 alumnos pasamos a grupos de non máis de 8 (sete alumnos/-as e o/a coordinador/-a) ou mesmo máis reducidos. Os espazos dos encontros serán o patio cuberto e en caso de moita choiva ou frío a aula (a nosa biblioteca é aula e non pode usarse). A desinfectación dos libros, subímolos da biblioteca e ata o día seguinte non se entregan ( en 2ou 3 horas xa poderían estar disponibles). O distanciamento será respectado en cada reunión e esta realizarase cada tres semanas polo que será necesario un apoio dixital das lecturas.
  • Os apoios e posibles situacións: Cada grupo lector recibirá apoio na súa lectura a través dun curso propio na aula virtual do centro ( Edixgal no caso do alumnado de primeiro ciclo); neste curso o profesor mediador contactará co alumnado, proporcionaralle material complementario e aclaracións á lectura, suxerencias, vídeos dos autores ou sobre as lecturas, audios, xogos, música, etc.  As canles de comunicación serán as oficiais. Tamén se comtempla a lectura en formato electrónico de ser necesario.
  • Os encontros virtuais no caso de confinamento: Os encontros presenciais do grupo lector poden transformarse en virtuais a través de CiscoWebex e mesmo se contempla o encontro con autores vitualmente. 
  • As actividades: A proposta de encontros virtuais co autor ou mesmo a visita dos mesmos á aula (como xa se fixo coa escritora Eva Mejuto,con moi boa acollida polo alumnado), a participación nas actividades (virtuais ou presenciais de ser posible) do Salón do Libro, ou mesmo o encontro con editores e libreiros.
  • Os medios de difusión: O curso da aula virtual do grupo lector, o blog "Nube de Palabras" dos Clubs do Sánchez e a súa páxina en Facebook.

 


Nestes momentos contamos xa con 9 grupos lectores de 1º, 3º e 4º de ESO, grupos lectores en lingua galega (maioritarios), lingua española e lingua inglesa; estan pendentes de concretar 2 grupos de 2º de ESO e 1 de bacharelato.

Contamos con 8 profesores mediadores de lectura de lingua galega, lingua inglesa, relixión e lingua castelá.

O proxecto dos clubs de lectura do noso instituto forman parte das actividades do Proxecto Lector  e están contemplados na PXA do noso centro. 

As lecturas: Pódese consultar a programación lectora do primeiro trimestre na seguinte ligazón:

 LECTURAS.


venres, 30 de outubro de 2020

Que non nos pille o virus sen un libro na man!!!

 E con tantos sobresaltos e perimetraxes, onte decidimos adiantar o reparto das lecturas dos clubs e coma o Covid non nos permite facer fotos de grupo tivemos que reinvertarnos.

Para mostra un botón:

 que non nos pille o virus sen un libro nas mans!!

 


 E os comentarios no Facebook da autora e dos editores de "SuperUlex":



martes, 27 de outubro de 2020

Volven os clubs de lectura do Sánchez Cantón: "Nube de Palabras"

 Pois por fin podemos poñer en marcha os clubs de lectura, non imos deixar que o virus poida connosco e interrumpa as nosas lecturas compartidas, ou sexa que...

IMOS ALÓ.....

Este curso mudarán algunhas cousiñas, os grupos lectores serán máis pequeniños, miniclubs, sete membrxs máximo, oito co coordinador; as sesións seguirán sendo no recreo pero como non podemos usar a biblio porque é aula de clase (excepto en bacharelato que pola tarde está libre), os encontros serán no patio cuberto (ben abrigadiñxs pois) para 1º de ESO e na aula para 3º e 4º de ESO.

As reunións presenciais serán máis espaciadas (cada 21 días) e teremos o apoio dos cursos abertos por cada coordinador/-a na aula virtual ( Edixgal para 1º de ESO e Aula virtual para os demais). Xa que logo no caso de confinamento xa teremos creado o noso espazo para o apoio non presencia.

 

 

Mais falemos xa de

 LECTURAS: 

 

 

 

  • 1º de ESO ( 5 grupos lectores, tres mediadores/-as):

Grupos lectores de 1º de ESO B/F, C1 e C2 lerán 

-"Icía quere cambiar o mundo" de Fina Casalderrey e ilustracións de Carmen Pernas.

-"Conta nove estrelas" de Andrea Maceiras.

- "Jules Verne e a vida secreta das mulleres planta" de Ledicia Costas.

Grupos lectores de 1º de ESO en español lerán:

- "Caperucita en Manhattan" de Carmen Martín Gaite.

-"Mi abuelo Moztezuma" de María García.

 

  • Grupo lector de 3º de ESO ( 1 grupo, unha mediadora) lerá:

- "A historia interminable" de Michael Hende ( en galego).

 

  • Grupos lectores de 4º de ESO ( 3 grupos, tres mediadoras) lerán:

- "Memoria do silencio" de Eva Mejuto.

- "SuperUlex" de Susana Sanches Arins.

Grupo lector de 4º de ESO en Inglés lerá:

"Little Women" de   Louisa May Alcott.


 

  • Queda pendente a organización do club de bacharelato en sesión de tarde pero aínda comezaron onte as clases presenciais e os miniclubs de 2º ESO.

 

 

Adiantámosvos que este curso teremos a compañía dunha superheroína moi, moi especial, SuperUlex. 

 

Xa preparados os libros, xa organizados os grupos, EMPEZAMOSSSSSS......

 

 

Agasallos desde Bonn.

Está mañá tivemos a sorpresa de recibir un agasallo que nos enviou a profesora Stefanie Bauer desde Bonn; un fermoso detalle para indicarnos que non se esquece do paseo literario que fixemos con ela e da sesión de club que compartiu connosco.

 


Grazas Stefanie.

sábado, 24 de outubro de 2020

Encontro literario coa escritora EVA MEJUTO ( Programa Actividades literarias en Institutos de Educación Secundaria. Ministerio de Cultura).

 


 

Innauguramos este estraño curso lector cunha visita de alto nivel, a da escritora Eva Mejuto, actividade encadrada dentro do programa do Ministerio de Cultura "Actividades literarias en Institutos de Educación Secundaria".

  http://www.culturaydeporte.gob.es/dam/jcr:0cb95498-6559-4c0d-a89e-369ac5d3e7e1/logotipo-dglfl.jpg

 


 

 

Coma a nosa biblioteca funciona coma aula e coma hai que respectar o tempo de duración das actividades e o número de participantes polas normas COVID, o encontro lector realizouse en dúas quendas e dous espazos ( a primeira na aula de 1º de ESO C e a segunda no paraninfo con 1º de ESO B e 1º de ESO F).

 

Aproveitamos esta visita para comezar as actividades de fomento da lectura que organizamos desde o club de lectura e celebrar ao tempo o Día das Bibliotecas ( aínda que fóra da biblioteca xa que esta foi reconvertida en aula).

 


 A escritora Eva Mejuto centrou o seu faladoiro coa rapazada no tema do oficio de escritora, no relato da súa traxectoria no mundo da escrita e na súas obras literarias publicadas para os e as, lectores xuvenís. Contoulle ao seu auditorio como era afeccionada á lectura e á escrita desde nena e como procurou unha profesión relacionada con estas, xornalismo; ben cedo descubriu que esta non lle gustaba e cando lle ofreceron traballar na editorial Kalandraka non dubidou en abandonalo e adicarse a "vivir do conto". Desde entón vive de facer libros e de escribir libros.

 

  Comezou a escribir adaptando historias ( a partir de contos tradicionais naceron os álbumes ilustrados Maruxa, A Mosca chosca ou Corre,corre cabaciña, traducidos a máis de dez idiomas). Vendo un documental que falaba sobre nenos trans naceu a idea de "22 segundos", xa que pensou que de escribilo podería servir para amosar distintas realidades do mundo trans. O libro fluiu grazas á documentación sobre o tema, traballo previo á escrita. Logo de escribir o libro hai que correxir e darlle moitas voltas ao texto relatoulle ao alumnado. O libro chegou, conta Eva Mejuto, cando se falaba do tema trans e xa vai pola sétima edición, tivo un longo percorrido e foi logo traducido ao español.  

 

 Para rematar o encontro, a nosa rapazada puido facer preguntas á autora e case non chegamos a tempo á seguinte sesión pois non deixaban de preguntar, o que amosa a boa conexión que se estableceu entre a escritora e o seu auditorio. Agradecementos, un caloroso aplauso e a invitación a futuros encontros e lecturas puxo final a esta reunión tan enriquecedora.

 


 

Grazas á autora Eva Mejuto e ao Ministerio de Cultura por facilitarnos esta actividade. 



luns, 19 de outubro de 2020

Preparando o encontro lector coa escritora Eva Mejuto.

 O vindeiro día 23 de outubro visitaranos a escritora Eva Mejuto para falar con nós sobre "o oficio de escritora" e sobre a súa novela "22 segundos". Para ir sabendo algo máis dela podedes consultar este enlace da galipedia co seu currículo: 

EVA MEJUTO.

 

 


 



domingo, 11 de outubro de 2020

Día das escritoras, 19 de outubro.

Iniciamos as publicacións deste curso 20/21 (que tivo un comezo tan especial) cunha celebración, a do DÍA DAS ESCRITORAS; a Biblioteca Nacional tivo a iniciativa desta conmemoración coa finalidade de recuperar o legado destas e visibilizar o seu traballo no ámbito da literatura e combater a discriminación que sofreron na historia (fonte: Galipedia).

O lema desta edición é " "O esforzo cotián das mulleres"  e nesta liña as Bibliotecas Escolares de Galicia realizaron unha selección de textos de escritoras galegas (na cal participamos) que nos falen de mulleres galegas "bravas" coa fin de ponderalas.

Deixámosvos aquí o enlace para a descarga desta pequena antoloxía de textos coa idea de que poidamos lelos e coñecelos mellor nesta data tan significativa. Vaian como adianto as palabras que a nosa amiga e escritora Eva Mejuto puxo en boca das irmás Touza, heroínas na escuridade e protagonistas da súa novela " Memoria do silencio":

"Tócanos facer as cousas ás agachadas, que non se note que estamos, porque somos invisbles como o ar. O que non saben, ou non pensan, é que o ar se coa en todos os recantos precisamente poque non se ve. Así facemos nosoutras."

 "O esforzo cotián das mulleres" :

https://www.edu.xunta.gal/biblioteca/blog/files/D%C3%ADa_das_Escritoras_20.pdf


 


sábado, 13 de xuño de 2020

Avaliación do club de lectura

Despois do brusco remate deste curso e dos nosos clubs non debedes esquecer dúas cousiñas, cubrir o formulario de avaliación e devolver os libros na biblioteca especificando que pertencen ao club de lectura.


sábado, 28 de marzo de 2020

Mensaxe de ANDREA MACEIRAS ao alumnado dos clubs de lectura.

Nestes tempos de confinamento, a escritora Andrea Maceiras,  da que lemos obras en 1º de ESO ( Conta nove estrelas,) e 4º de ESO ( O que sei do silencio), e coa que tiñamos programado un encontro lector en abril na Coruña, conxuntamente co alumnado do IES Agra do Orzán desta cidade, amablemente quixo enviarnos esta mensaxe de ánimo lector: 

Grazas mil, Andrea Maceiras.


venres, 6 de marzo de 2020

A filla do Minorauro

Rematadas as reunións e a lectura do libro é, agora, o momento de comentalo.
Como recomendaríades esta obra?


mércores, 12 de febreiro de 2020

"O pez que sorría" de Jimmy Liao



De paso que realizamos o comentario  sobre a lectura d' O som das cores de Jimmy Liao, no grupo do club de 3º de ESO, aproveitaremos tamén para ver esta curtametraxe sobre a súa obra: O pez que sorría.


xoves, 6 de febreiro de 2020

Mary Jonh de Ana Pessoa; lemos en portugués.




 
 O noso club de 4º de ESO animouse a ler unha novela xuvenil en portugués, trátase de Mary Jonh de Ana Pessoa e aquí podesdes velos gozando da edición antes de comezar a lectura:






venres, 24 de xaneiro de 2020

Paseo literario: Roteiro coa profesora Stefanie Bauer.



O club de 1º de Bacharelato conduciu á profesora alemá Stefanie Bauer, profesora de intercambio de Bonn, nun percorrido polos textos literarios e os seus espazos en Pontevedra.

Esta mañá  realizamos unha incursión lectora polas rúas de Pontevedra coa idea de aportar unha visión literaria da nosa cidade á profesora alemá que nos visita estes días.
Paradas nos lugares e textos: O Ravachol ou a igrexa de Santa María con Torrente Ballester, a praza de Méndez Nuñez de Valle Inclán, a igrexa de San Francisco con Paio Gomes Chariño, as prazas da cidade con Castelao, a Ferrería con Amado Carballo... e a nosa convidada escoitou, preguntou e respectou a nosa cultura e á nosa lingua, as nosas letras.

Un café quentiño a carón de San Domingos rematou este fermoso paseo/ convivencia lectora, ao que a profesora correspondeu agasallando ao alumnado cuns saborosos caramelos da Alemaña.





martes, 21 de xaneiro de 2020

Andainas lectoras II: 2º trimestre.



Grazas á asignación de fondos recibidos do programa de clubs de lectura da Consellería de Educación


 puidemos realizar unha importante compra de novidades lectoras para os nosos clubs, unha moi boa nova para todos os que participamos destes grupos lectores e que agradecemos de corazón.
As lecturas deste trimestre son pois:

1º de ESO:
Grupo A: Kafka e a boneca viaxeira de Jordi Sierra y Fabra.
Grupo B: Conta nove estrelas de Andrea Maceiras.
Grupo C: El asesinato de la profesora de lengua de  Jordi Sierra y Fabra.

Grupo de inglés: Little women de Louisa May Alcott (adaptación)

3º de ESO:  
Atranco no banco de Manuel Núñez Singala.

4º ESO:
Grupo A: DX de Eli Ríos.
Grupo B: O que sei do silencio de Andrea Maceiras.
Grupo linguas clásicas: Libro das alquimias de Xesús Constela.

1º Bacharelato:
Grupo A ( 1º e 2º bach.): A arte de trobar de Santiago Lopo.
Grupo B: A historia interminable de Michael Hende (en galego)
Grupo C: Tu contas, eu conto de Susana Aríns.

Grupo de igualdade: Senlleiras de Antía Yáñez.


E agora a desfrutar das lecturas... e tamén do cine:


"O som das cores" de Jimmy Liao no club de lectura.

Cando a luz desaparece, a soidade e o medo poden achegarnos ao "som das cores" e a luz e a harmonía poden chegar a iluminar o camiño.
O som das cores, álbum do ilustrador taiwanés Jimmy Liao, foi escollido polo noso club como lectura inclusiva para achegarnos ao mundo da protagonista que ao cumprir 15 anos queda cega; a maiores de gozar das fermosas imaxes e da grande sensibilidade e imaxinación do autor, coa selección deste título queriamos poñernos na pel da protagonista, sentir o seu medo e a súa soidade para comprendela, empatizar coa personaxe e descubrir un camiño no que o son pode facernos sentir as cores do mundo que nos rodea a pesar da escuridade.
Di Rainer Maria Rilke no seu poema "A cega":

Agora xa non teño que pasar sin iso:
todas as colores tradúcense
en sons e olores.
E resoan como melodías
de beleza infinita.

Así mesmo a nosa rapaza protagonista  pasa da escuridade do metro (entre a realidade e a imaxinación) a escoitar o son e precibir as cores que producen espazos e seres, realidades e fantasías que vai atopando ao saír por distintas bocas do metro: páxinas nas que a cor e as figuras son verdadeira poesía en imaxes.

Coma noutras obras de Jimmy Liao tamén aquí está presente a influencia de pintores impresionistas, surrealistas e a representación de imaxes do mundo real. Grazas á colaboración do noso compañeiro e profesor de historia Humberto Martínez Gargamala, puidemos identificar moitos deses paralelismos pictóricos que son referentes artísticos no álbum e desfrutar deles nesta presentación de diapositivas da súa autoría coa que nos agasallou:




Relacionamos tamén este album con outras dúas xoias moi inclusivas que recomendamos para complementar a súa lectura:

Resultado de imaxes para album ilustrado con figuras em braille