Encontro lector con Lois Pérez arredor de "Cartas na escuridade"

 

O pasado mércores 2 de abril, o alumnado mantivo no Salón do Libro un encontro co escritor Lois Pérez, para falar arredor da súa novela Cartas na escuridade, gañadora do premio Mª Victoria Moreno de narrativa que previamente leramos e analizaramos nos nosos clubs de lectura de 1º bach.

Unha conversa amena e chea de contido, reflexións e  historias acompañounos neste encontro lector a partir da novela lida . Falamos con Lois Pérez de literatura, do mundo e da vida cun importante fondo musical e recomendacións de obras e cancións.

PÚRPURA TERO, encontro literario con DAVID CORTIZO máis alá da galaxia.

 Realmente a maxia dos libros e do Salón do libro transpórtanos máis alá das estrelas e máis lonxe aínda cando o escritor e editor David Cortizo lévanos de viaxe por Púrpura Tero.

O alumnado dos clubs de lectura de 1º ESO B e E, reuníronse este martes 1 de abril co creador dos mundos fantáticos do planeta Púrpura Tero.

O encontro lector foi moi ameno e o autor respondeu as múltiples preguntas da rapazada sobre a novela, as motivacións e técnicas da escrita, escenarios, personaxes e tamén as influencias textuais e cinematogràficas que tivo.

Grazas ao Salón do Libro de Pontevedra, puidemos realizar este enriquecedor faladoiro e vaia o noso agradecemento ao Salón do Libro por proporcionarnos as fotos que ilustran esta recensión.

Ademais tivemos a sorte de ser o primeiro club de lectura co que se reunía o autor polo que todos desfrutamos desta sesión e puidemos celebrarmos xuntos o Día do LIbro.

Encontro lector con Fina Casalderrey

 

Marabilloso o encontro lector do alumnado de 1º de ESO coa nosa querida escritora e académica Fina Casalderrey. A conversa xirou arredor da obra da escritora e concretouse na novela lida polo alumnado O misterio dos fillos de Lúa. 

As imaxes son do Salón do Libro que foi o organizador deste encontro: 

Imos ao cine: AS NEVES.

 

O luns os clubs de lectura de 1º de bacharelato asistimos a unha actividade de cine forum coa proxección do filme AS NEVES de Sonia Méndez.

A película gustou moito á rapzada, pola temática que trata unha problemática derivada da adolescencia e polo elenco constituído tamén por adolescentes. Logo do visionado do filme tivemos un interesante coloquio coa directora Sonia Méndez e coa protagonista Andrea Varela que moi amablemente responderon ás nosas preguntas.

Resultou que a directora da película tamén estudara no Sánchez Cantón polo que a empatía foi mutua entre os participantes na actividade.

Esta actividade foi organizada polo Salón do Libro de Pontevedra. grazas por convidarnos.

SALÓN DO LIBRO: Festa dos Clubs de Lectura

 Coma xa somos habituais, os clubs de 1º , 2º e de 3º de ESO asistimos á Festa dos clubs de lectura que organiza o Salón do libro para os clubs de lectura de Secundaria de Pontevedra e arredores. 

Tras a presentación de cada un dos clubs participantes e a actuación dun contacontos de Cangas tivemos o sorteo de libros para os clubs que tanto emocionan á rapazada. 

Logo os clubs de 1º de Bacharelato puideron asistir á representación do musical Os miserables de Víctor Hugo, posta en escea maxistral do IES Illa de Ons de Bueu.

Grazas ao Salón por convidarnos xa que houbo festa para todos e todas, lectores dos nosos clubs de ESO e de Bacharelato.

Invisibles de Eloy Moreno no club de 3º de ESO

 Velaí tedes as fotos da sesión do club de castelán de 3º de ESO con Gabriela a súa coordinadora: 

Fóra de campo de Rosalía Fernández Rial

 No club de lectura de 1º de bacharelato estamos lendo teatro, en concreto a obra de Rosalía Fernández Rial gañadora doPremio Roberto Vidal Bolaño 2024.

Unha obra de teatro protagonizada por adolescentes na que atopamos temas tan actuais como o mundo dos influencer, as redes sociais, o maltrato adolescente, a amizade, a sororidade, o deporte, a filosofía... acompañados por unha banda sonora do máis suxerente.

Destacan na obra tamén os xogos escénicos: o xogo das pantallas e os espazos reais, o xogo das luces e as sombras que fan da posta en escea todo un reto.

Afectos e sentimentos entre a mocidade cativarán de certo aos nosos lectores e lectoras.